കവിത - ഇന്ദു സുധീഷ്

.......

വീട്

.......

നഷ്ട്ടപ്പെടും വീടുള്ളോർക്കു

കാലമില്ല ദേശവും ;

മുൾമുനയെന്നും കൂടില്ലാക്കിളിയുടെ

ചിറകറ്റ ദിശാബോധം ,

നിശബ്ദമാണവരുടെ വശ്യത ,

ചടുലമാണു  നീക്കങ്ങൾ,

വാടക ഗേഹത്തിൽ തുറന്നലയ്ക്കുമവരുടെ

വിളികളോയെന്നും 

കാണിയില്ലാനാടകത്തിന്റെ 

ക്ലൈമാക്സിലെപ്പൊഴേ പിടഞ്ഞു വീണു.

വരും പ്രഭാതങ്ങളിൽ

വരിഞ്ഞുമുറുക്കും വരൾച്ചയും 

മറുകരയെത്തിയ്ക്കും തിരയിളക്കവുംവീണു

ഹൃദയത്തിലുറയും കനൽക്കട്ടകൾ.

അതിർത്തിയ്ക്കു നേർത്ത 

വരപോലുമില്ലാതെ-

യെന്നേയവിടവും വിജനം.

നറുപുഞ്ചിരിയിൽ നിലാവിനറ്റമില്ലാത്ത

കൈപ്പുഴകളിൽ ,

മയിൽപ്പീലിത്തുണ്ടുകൾ

സൗഹൃദത്തിൻ മഴയായ് പൊഴിഞ്ഞൊരു

നന്മ വീടാകുന്നതേയവർക്കു സ്വപ്നം,

നിരന്തരം ഭംഗമേറ്റുടഞ്ഞ ദു:സ്വപ്നവും.

ഇന്ദു സുധീഷ്